Biketour 16. - 17. August 2014

Mi het am Samstig nid gwüsst wie das Wätter wot, aber mir sie glich gstartet. Mit em Outo nach Merligen, vo dert mit em Bike richtig Habkeren. Nach em Kafihalt hets ume afe rägne, das het üs nit gstört. Mit viu Humor u Freud am Sport heimer Resturant  Vorsass ( Mittelstation vor Niederhornbahn ) erreicht.

Chleider tröchnet, der Mage gfüllt mit feine Sache, heimer när Abfahrt uf Merligen gnosse.

Hei ga duschne u scho hets Znacht im Beluga Reutigen gwartet.

Am Sunntig da heimer scho am Morge Sunnebrülle dörfe allege. E schöne Sunnetag het üs erwartet.Richtig Eggiwil simer mit de Outo gfahre. I zwone Gruppe ischmer när mit de Bike gstartet. Dür die hügeligi Landschaft vom Aemmital simer uf em Wachthubel acho.Da heimer freundlichi Wanderer troffe…. Sie hei immer no gfühl, Biker mache Wanderwäge kaputt. Wemer aber e gägesitigi Doleranz zeigt, heimer aui Platz ir Natur.

Bim Geissbühl Ramisgumme, Restaurant Erika, het die zweiti Gruppe gwartet. Sie hei e liechteri Strecki gmacht. Nach em Mittagässe simer de zäme gfahre, dür cooli Singeltrails. Mi isch haut de chli träckig worde, aber nid aui….

Bir Andrea ( ehemalige Erlenbachere ) heimer üs no mau gsterkt u si no eis i ne super Abfahrt bis mir aui Eggiwil uf em Parkplatz si gsi.

Es grosses Dankeschön a Heinz Moser für die schöne Toure :) 

Elisabeth Rösti u üse Präsi hei für Ässe u Organisation gluegt. Danke viu mau.

Beat Steiner